DJ Keu, alias Marc Kooij, is in bysûndere ferskining. Mei syn lange, tinne lichem en syn, sa’t er it sels seit, âlderwetske holle, wurdt er in soad neisjoen op strjitte. Mar net allinnich syn uterlik is bysûnder. Marc is tige yntrovert en beskieden. Programmamakker Halbe Piter Claus makke in bysûnder portret.
Marc wurdt in soad neisjoen op strjitte. Mar net allinnich syn uterlik is bysûnder. Marc is tige yntrovert en beskieden. Nettsjinsteande dizze eigenskippen hat hy de ûnbetwingbere driuw om himsels sjen te litten. Dit docht hy troch soloprojekten ûnder de namme DJ Keu. Hy skriuwt Nederlânsktalige ferskes dy’t hy by de kompjûter sjongt. En hy spilet yn twa bands: Utpunkt en Le Mistral. Boppedat is hy ien fan de fêste kearn fan it keunstnerskollektyf De Zoete Hanen. Neist al dizze kreative útspattings hat er ek noch gewoan in baan as praktykbegelieder by it reintegraasjebedriuw Fourstar. It libben hat foar Marc net altiid maklik wêst. De heit fan Marc: “Marc koe muoilik syn draai fine, hy libbe yn syn eigen wrâld.” Pleage waard Marc mei syn uterlik ek. En hy mislearre as profesjoneel muzikant. Dochs hat hy yn de rin fan de jierren fan syn swakke punten syn krêft makke. Sa ferhiert er himsels as model oan filmers, fotografen en keunstners en stelt hy him kwetsber op yn syn nûmers. Mar ek dit giet net sûnder de hurde konfrontaasje mei it skjintme-ideaal fan hjoed-de-dei.
Minsken is in rige portretten oer Friezen mei in bysûndere passy, libbenswize of karriêre, dy’t harren dêrfoar ynsette. It binne gjin bekende Friezen, mar gewoane minsken dy'tst alle dagen tsjinkomme kinst, mar dy’t dochs in hiel bysûnder libben hawwe.