Se is 24 jier en wurdt sjoen as in grut muzikaal talint: Elske DeWall, fan Ljouwert. Se hat in dyk fan in stim, skriuwt har eigen ferskes en spilet gitaar, piano en saksofoan. Har grutte dream is trochbrekke as sjongeres. Noch mar krekt ôfstudearre oan de Popakademy foar Popkultuer, tekenet Elske yn desimber 2008 in kontrakt by Universal Music. De ferwachtings binne grut. Mar kin se it wiermeitsje?
Optredens, co-writes yn it bûtenlân, fotoshoots... It libben fan Elske stiet al in pear jier op syn kop. Tuskentroch wie se noch special guest by de teatertoer fan sjonger Syb van der Ploeg en die se mei oan it projekt 'Cohen yn it Frysk', wêrby’t ferskate artysten yn it Frysk ferskes songen fan de Kanadeeske singer-songwriter Leonard Cohen. Universal Music stjoert har sels nei New York ta om har debútalbum 'Balloon over Paris' op te nimmen. Dochs komt it súkses net fansels. Elske moat der hurd foar wurkje om har dream wier te meitsjen en miskien noch wol mear...
Alle wiken wurdt der in dokumintêre fan Omrop Fryslân útstjoerd op Nederlân 2, sneins om 14.00 oere. Jûns kinne jo de dokumintêres ek weromsjen op Omrop Fryslân om 18.00 oere en tongersdeis om 17.15. Nei ôfrin kinne jo it programma ek altyd weromsjen op ús website www.omropfryslan.nl