De Omrop op 'e iPhone

Yn opdracht fan Omrop Fryslân hat Speak in nijsapplikaasje ûntwikkele foar de Apple iPhone en de iPod Touch. In unyk produkt, omdat it de earste Frysktalige iPhone-applikaasje is. In grut publyk kriget dêrmei tige fluch, altyd en oeral tagong ta it lêste nijs út de provinsje. De earste Fryske iPhone-applikaasje is ûntwikkele yn de hússtyl fan Omrop Fryslân en is fergees del te heljen fia de App Store fan Apple. In primeur, want dêrmei is Omrop Fryslân de earste regionale omrop mei in folsleine nijsfoarsjenning op de iPhone wêryn’t kontinu nijsitems taheakke wurde yn de foarm fan tekst en foto’s.

Omrop Fryslân hat de ambysje om it liedende ynformaasjemedium fan de provinsje Fryslân te wêzen. Mei de iPhone-applikaasje wurdt it nijs fan Fryslân nóch tagonkliker foar in grut publyk. Omrop Fryslân is de iennichste publike omrop yn Nederlân dy’t net Nederlânsktalige programma’s produsearret.

De Omrop al 1000 kear op ‘e iPhone!

De nijsapplikaasje fan Omrop Fryslân foar op de Apple iPhone is in grut sukses! De earste Frysktalige iPhone-applikaasje is noch mar krekt trije wiken beskikber en is no al 1000 kear delhelle fia de App Store fan Apple.

Omrop Fryslân is de earste regionale omrop mei in folsleine nijsfoarsjenning op de iPhone dêr’t kontinu nijsitems yn tafoege wurde yn de foarm fan tekst en foto’s. Sa ha minsken fluch, altyd en oerol, tagong ta it lêste nijs út ús provinsje. Dus ûnder it sporten of kuierjen, yn de trein, of sels ûnder it skriuwen fan de Sinteklaasgedichten: as earste op ‘e hichte fan it lêste Fryske nijs!

Wolle jo ek de Omrop Fryslân nijsapplikaasje op jo iPhone of iPod Touch ha? Op omropfryslan.nl fine jo mear ynformaasje én in stap-foar-stap hantlieding foar it ynstallearjen fan de applikaasje.

Mear oer Speak

Speak is in digitaal kommunikaasjeburo en spesjalisearre yn websites, narrowcasting, ynteraktive screensavers, touchscreens, mobile tapassings en oare foarmen fan digitale kommunikaasje. Dat alles op basis fan it eigen ‘Speakpoint multichannel CMS’. Boppedat is Speak sparringpartner op it gebiet fan ynternet marketing en konversje.

Omrop Fryslân en Speak wurkje sûnt 2007 gear op it mêd fan digitale media. Earder tekene Speak al foar de technyske realisaasje fan de website fan Omrop Fryslân, dat foarsjoen is fan in folslein Frysktalich Content Management System. Mei dat behearplatfoarm ûnderhâlde de redakteuren fan de omrop net allinne de website, mar ek de weblogs, de deistige e-mail nijsbrief, de nijs-ticker op Dei-tv, rss-feeds, en de eigen teletekstservice Fryslân Text.

De iPhone-Applikaasje yntallearje

Stap 1:
Set jo iPhone oan.
 
Stap 2:
Tip op App Store.
 
Stap 3:
Tip yn de swarte balke ûnderoan op de sykknop.
 
Stap 4:
Toets it folgjende yn yn jo sykskerm: Omrop Fryslân.
 
Stap 5:
De applikaasje fan Omrop Fryslân ferskynt yn byld, tip dêrop.
 
Stap 6:
Nei’t jo tipt hawwe op Omrop Fryslan, kieze jo foar gratis>.
 
Stap 7:
Nei’t jo tipt hawwe op gratis>, ferskynt der in tekst yn byld oer de applikaasje. Tip no op installeer.
 
Stap 8:
Toets jo wachtwurd yn. Nei it ynfoljen fan jo wachtwurd, wurdt de applikaasje ynstallearre op jo iPhone.
 
Stap 9:
De applikaasje is no ynstallearre en te sjen op jo startfinster.
 
Stap 10:
Tip op Omrop Fryslân en genietsje fan de Omrop Fryslân iPhone-Applikaasje!

Mooglik mear iPhone-applikaasjes

Mooglik komme der yn de takomst ek noch in twadde en tredde ferzje fan de Fryske iPhone-applikaasje. Yn de twadde ferzje soe de applikaasje útwreide wurde kinne mei in mooglikheid om fideo’s te besjen. Mei de tredde ferzje soene ek live radio-útstjoerings folge wurde kinne.